ابنى و ابنى و علّى السور
مهما حاولت تشد النور
بين الموت و الموت محصور
طير مجروح بجناح مكسور
حتى كمان قلبك مفطور
مقهور مظلوم مهموم مغمور
خطوة و خطوة و ريحة موت
صرّخ غنّى و علّى الصوت
مهما تصرخ بردو مفيش غير صدى لسكوت
و بردو عليك الحظ يفوت
مهموم زعلان تايه مكبوت
عايش عشان كل يوم تموت
قبل الموت بموتين اتنين
خطوة بخطوة و وش حزين
حزن و حزن و دمع سنين
استلف الفرح كمان اهو دين
و اشترى ضحكة و ارسم مثّل بسمة على الصفين
مهما حاولت تسد الدين
مهما حاولت تدارى تخبى ان انت حزين
حزنك زى الشمس.. شكلك بايخ و بوشين
شمس حزينة و قلب حزين
حزن يشد
و حزن يهد
و حزن يخلى العيل جد
و الأحزان ياما ما تتعدّ
و اهو عداد العمر يعد
و لسة فى نفس السكة السد
شاب شايب و شبابه اختصره فى سطرين
بين السطر و سطر كلام
سطر الحب
و سطر الموت
و مابينهم ماتت الأحلام
ارسم بسمة سارقها
اكدب فرحة
حتى الفرحة نافقها
و امسح جوخ الغلب
موّت كمان القلب
اخطف قلب سعيد
عيد الحزن تانى و عيد
اقتل كل الحزن
غرّق كل الكبت
مهما سافرت بعدت و غبت
مهما هربت
بردو حزين
قلب مزور عاش فى الكدب سنين و سنين
اكدب نافق ماطل
عيش ميت بقلبين
وزّع كدبة و زيد اتنين
عيش فى الكدب
و موت بالكدب
كل حياتك كدب فى كدب
و يوم ما تفكر تصدق
حتى حقيقتك صدقك.. نوع من الكدب...
بقلم/ ولاء كامل على
1 Comments
